27 urteko gazte bat atxilotu dute bart Abadiñon

Gaur goizaldean 27 urteko gazte bat atxilotu dute Abadiñon, bere bikote kide ohiari tratu txarrak eragin eta sexu abusuak egitea leporatuta. Biktimak salatu zuenez, asteartean eta asteazkenean eman ziren tratu txarrak.

Biktimak atzo –eguenean- jarri zuen salaketa. Abusuak asteartean eta asteazkenean izan ziren Abadiñoko etxebizitza batean. Lehenengo bere bikotekide izanaren partetik tratu txarrak jaso zituela salatu zuen eta, ondoren, sexu abusuak jasan zituela. Bikotea banatze tramiteetan zegoen.

www.anboto.org

Tirakada eginez poltsa bat lapurtzeagatik atxilotu dute

Ertzaintzaren agenteek 19 urteko gazte bat atxilotu zuten atzo Berrizen, poltsa bat tirakada eginez ostea egotzita. Lapurreta Durangon jazo zen hilaren 18an, eta biktima Galdakaoko Ospitalean artatu behar izan zuten.

www.ertzaintza.net

Urtarrilaren 18an, adineko emakumezko bati lapurreta egin zioten Durangon, bere etxeko atarian sartzera zihoanean. Biktimak salatu zuenaren arabera, pertsona batek poltsatik heldu zion eta zenbait metro arrastaka eraman zuen espaloitik, poltsa eskuratzea lortu eta alde egin zuen arte. Gertakari horien aurrean, anbulantzia bat bertaratu zen eta biktima Galdakaoko Ospitalera eraman zuen, zenbait ubeldura eta buruan zauri bat zituelako.

Durangoko ertzain-etxeko agenteek gertakaria ezagutu zutenean, ikerketa abiatu eta lapurretaren egilea identifikatu zuten. Hortaz, atzo (astelehena) Berrizen atzeman eta atxilotu zuten. Atxiloketaren unean gazteak aurka egin zien ertzainei eta, ondorioz, agenteetako batek hainbat ubeldura izan zituen.

Atxilotua (delitu aurrekariak dituen 19 urteko gizon bat) epailearen esku jarri dute gaur goizean.

Durangaldeko ortuetatik, fruta eta barazkiak

BERRIZ. San Anton jaiak asteburu honetan bukatuko dira Berrizen (Bizkaia). Igandean egingo den nekazaritza eta artisautza azoka izango da azken ekitaldietako bat. 11:00etan hasiko dira eskualdeko baserritarrak eta eskulangileak euren produktuak saltzen. Festa giro horren barruan, okelaren jaia ere egingo dute, Urtiaga plazan. 12:00etan, haragia dastatzeko aukera egongo da.

www.berria.info

Udaletxe eta notaritzetan sinatzera deitu dituzte herritarrak

www.anboto.org

Datorren martxoaren 1ean egingo diren Eusko Legebiltzarrerako hauteskundeetan “abertzale eta ezkertiarrek ahotsa izan dezagun”, Udaletxe eta notaritzetan Demokrazia 3.000.000 herri plataformak parte hartu ahal izan dezan, sinatzera deitu dituzte Durangaldeko hainbat herritako ezker abertzaleko ordezkariek herritarrak. Abadiñoko Errota kultur etxekoan bildu ziren atzo Demokrazia 3.000.000 herri plataforma sostengatuko duten sinadurak eskatzera Otxandio, Durango, Zaldibar, Berriz, Izurtza, Atxondo, Elorrio, Mallabia eta Iurretako ordezkariak. Ezker abertzaleak, hauteskundeetan egoteko eskubidea dutela nabarmendu dute, eta martxoko hauteskundeei begira sortutako Demokrazia 3.000.000 plataformari bultzada ematera deitu dituzte herritarrak, Oleagaren berbetan, “zero demokraziatik, demokrazia hiru milioira” ailegatzeko. Urtarrilaren 24rako, EAEn jasotako 18.000 sinadura aurkeztu beharko ditu gutxienez, hauteskundeetan zerrenda izateko. Bizi dugun gatazka, kriminalizazioa eta errepresioa “luzatu” barik, konponbidea bilatzeko, ezinbesteko ikusten dute ezker abertzaleko ordezkariek aldaketa, eta horretarako beharrezko zehaztu dute aldaketa bideratuko duten Durangaldeko herritarren sinadura. Eusko Legebiltzarrerako martxoko hauteskundeetan, “aukera politiko guztiek aukera berdinak izan ditzaten”, Udaletxe eta notaritzetan sinatzera deitu dituzte Durangaldeko herritarrak.

Sinatzeko leku eta ordutegiak:  http://ttiki.com/1894

Palestinarekin elkartasuna: Dani Maeztu durangarrak Veoliarekin akordioa eteteko eskatu du

Aralarrek Veoliarekin akordioa eteteko eskatu du

BERRIA- www.berria.info

Legebiltzarrerako bozetarako Aralarreko Bizkaiko zerrendaburu Dani Maeztuk EAJri eta EBri esan die Palestinako auzian «hitzetatik ekintzetara jauzia egiteko ordua iritsi dela». Bi alderdiek Veolia multinazionalarekin kontratua egina dute, Bilbobus udal autobus zerbitzua kudeatzeko. Veoliak legez kanpoko koloniak lotuko dituen tranbia eraikitzen dihardu Palestinan.

Aske utzi dituzte Zornotzan atxilotutako lau lagunak

Ertzaintzaren «jarrera oldarkorra» salatu du AHT Gelditu! Elkarlanak eta protestak antolatu ditu gaurko

BERRIA- www.berria.info

Ertzaintzak libre utzi ditu Zornotzako (Bizkaia) desjabetzeen aurkako elkarretaratzean atzo atxilotutako lau lagunak. Atxilotuek epailearen aurrean agertu beharko dute, hala eskatzen dietenean. Ertzaintzak «ordena publikoaren kontra» egitea leporatu die, elkarretaratzearen ostean izandako istiluen ondorioz.

Protesta 08:30ean hasi zen Zornotza Aretoaren aurrean. Bertan, kaltetuek desjabetze aktak sinatu zituzten goizean. Elkarretaratzeak 50 minutu iraun zuen, eta bukatzean istiluak sortu ziren hirigunean. Eusko Jaurlaritzako Herrizaingo Sailak azaldu duen legez, ezezagun talde batek errepidea itxi zuen, bidean edukiontziak gurutzatuz.

Zornotzako AHT Gelditu! Elkarlanak gogor kritikatu du Ertzaintzak protestaren aurka izandako «jarrera oldarkorra». Elkarlaneko kideek gertatutakoaren berri eman dute: «Ertzaintza bertaratu eta han zeudenei oldartu ostean, lau gazte atxilotu eta beste hainbat identifikatu ditu». Aldi berean, taldearen konpromisoa berretsi dute: «Gure herriak proiektu honen kontra jardungo du, nahiz eta EAJren borreroek halako jarrera antidemokratikoekin erantzun».

Elkarretaratzeak herriz herri

Elkarlanak elkarretaratzeak antolatu ditu gaur hainbat herritan «AHTren sustatzaile diren alderdi politikoen egoitzen aurrean». Protestak 18:30ean hasiko dira Durangoko batzokiaren aurrean. 19:00etan, berriz, elkarretaratzera deitu dute Gasteizko Araba Buru Batzarreko egoitzaren parean, Basauriko PSOEren egoitzan eta Beasaingo udaletxe aurrean.

19:30ean elkarretaratzea eta giza katea egingo dituzte Donostiako PSOEren egoitzatik Alderdi Ederreko EAJren egoitzaraino. Ordu berean, ekitaldiak izango dira Arrasateko PSOEren egoitzaren aurrean eta Tafallako udaletxe parean. Azken elkarretaratzea Altsasuko udaletxe aurrean izango da, 20:00etan.

Horrez gain, ezker abertzaleak larunbatean Urbinan (Araba) egingo den AHTren aurkako manifestazio nazionalean parte hartzeko deia egin die langileei: «Proiektu honek EAJ, UPN, UMP eta PSOEren eredu ekonomikoa eta neoliberala indartu baino ez du egiten».

Ertzaintzak AHTren kontrako lagun bat atzeman du Zornotzan, lurren desjabetzeen ekitaldian

Ertzaintzak lagun bat atxilotu du gaur goizean Zornotzan (Bizkaia) Abiadura Handiko Trenaren (AHT) lurren desjabetzeen ekitaldian hainbat pertsonek egindako protestan. Ertzainek beste hainbat lagun identifikatu egin dituzte. Trafikoa moztea eta bi edukiontzi errepidera ateratzea egotzi diete. Espainiako Sustapen Ministerioko ordezkariak joan dira hara aktak sinatzera.

Goizeko zortzi eta erdietan hasi dute AHTren egitasmoko kontrakoek elkarretaratzea, eta Ertzaintzak, aurrez, akten sinatze ekitaldia egin duten eraikineko inguruak itxi egin ditu.

AHT Gelditu! Elkarlanak larunbat honetarako Urbinan (Araba) manifestazioa antolatu du, AHT Gelditu! Lurra berreskuratu! leloarekin. Bihar ere hainbat ekimen egingo dituzte.

www.berria.info

Lau zaborrontzi erre dituzte Durangon

Lau zaborrontzi erre zituzten atzo Durangon, suhiltzaileek jakitera eman zutenez. Urteberri egunean hiru erre zituzten. Lehen bi zaborrontziak herenegun erre zituzten Oiz eta Azoka kaleetan. Atzo, arratsaldeko 19:00etan beste zaborrontzi batean eragindako sutea itzali zuten suhiltzaileek. Laugarrena, berriz, Sasikoa kalean erre zuten.

www.berria.info

Desjabetzeen aurka, mobilizazioak

www.berria.info

 Datorren asteazkenean, hilak 14, abiadura handiko trena egiteko lurren desjabetze aktak sinatzekoak dira Zornotzan (Bizkaia).

Durangaldeko AHT Gelditu! Elkarlanak mobilizaziora deitu ditu egun horretarako herritarrak.

EHNEk, LABek, ezker abertzaleak eta Aralarrek bat egin dute deialdiarekin.

Asteazkenean, 08:30ean, Zornotzako udaletxearen aurrean kartelada egingo dute, eta, ostegunean, 18:30ean, beste kartelada bat egingo dute, Batzokiaren aurrean.

Garai, turismo bat lapurtu du eta furgoneta bat indarra erabiliz ireki du barruan lo egiteko

Durangoko ertzain-etxeko agenteek 18 urteko gizonezko bat atxilotu dute gaur [2009-01-08] goizaldean Garain, turismo bat lapurtzea eta indarra erabiliz furgoneta bat zabaltzea leporatuta. Azken ibilgailu honetan aurkitu zuten agenteek gaztea, lozaku batez estalita.

ERTZAINTZA – www.ertzaintza.net

Gaur [2009-01-08] goizaldeko hiru eta erdiak aldera herritar batek Ertzaintzari jakinarazi dio gazte bat Ford Fiesta turismo batean iritsi dela Garaiko San Migel auzoko aparkaleku batera eta furgoneta bateko sarraila maneiatu ostean bertan sartu eta han gelditu dela. Patruila bat bertaratu da eta ikusi du Ford Fiesta turismoaren abiarazteko sistema maneiatuta zegoela eta furgonetaren barruan 18 urteko gizonezko bat zegoela lozaku batean lo egiten.

Agenteek gaztea atxilotu dute, turismo bat lapurtzea eta furgoneta bat indarra erabiliz zabaltzea leporatuta.